5744. Tota plaga occidentalis erat plena talibus qui dejecti de coelis undique, et ibi aperiebat se terra, et operiebantur nimbo, ut non amplius resurgerent; erant omnes tales qui quidem agnoverunt Deum, et vixerunt moraliter bene, sed non cogitaverunt de Domino, nisi sicut de homine vulgari simili sibi, nec bonum egerunt propter Deum et quia praeceptum in Verbo, sed propter se et mundum; nec abstinuerunt a cogitare et velle malum, sed solum a facere malum ex timore legis, vitae, famae, honoris, et lucri, verbo quicquid fecerunt propter se fecerunt.