[7.9.] Super terra populi mei spina et sentis ascendet, quin super omnibus domibus laetitiae, urbe hilari, nam palatium erit desertum, multitudo urbis derelicta, clivus et specula erunt super speluncis in aeternum usque, gaudium onagrorum pascuum gregum. Donec effunditur super nos spiritus ex alto, tunc desertum erit in arvum; habitabit in deserto judicium, et justitia in arvo considebit, erit opus justitiae pax, et labor justitiae quies, et securitas usque in aeternum, ut habitet populus meus in habitaculo pacis, et in tentoriis securitatum, et in quietibus tranquillis, Esaj: XXXII: 13 ad 18, de Ecclesiae vastatione, et de statu ejus coelesti post redemptionem. [5.9.] Surgam, dicit Jehovah, nunc extollam Me. Qui ambulat in justitiis, et loquitur rectitudines, obturat aurem ne audiat sanguines, et occludit oculos ne videat malum, hic in altis habitabit, panis ejus dabitur, aquae ejus fideles. Specta Zionem, urbem festi stati nostri, oculi tui videant Hierosolymam, habitaculum tranquillum quod non dissipabitur, non removebuntur clavi ejus in perpetuum; ibi magnificus Jehovah nobis, Esaj: XXXIII: 8.9.10.15.16.[20.]21.22: ibi de vastatione Ecclesiae, et mox adventus Domini ad illam restaurandam. [7.7.6.9.10.] Contabescet omnis exercitus coelorum, convolventur sicut volumen coeli, omnisque exercitus eorum decidet, possidebunt eam platea et anataria, et noctua atque corvus habitabunt in ea, unde ascendent palatia ejus spinis, carduus et sentis in munitionibus ejus, ut sit habitaculum draconum, atrium filiabus noctuae, occurrantque Zijim cum Ijim, et Satyrus socio obviet, imo quiescet ibi lilith, invenietque sibi requiem. Nam dies vindictae Jehovae, annus retributionum pro lite Sionis, noctu et interdiu ignis ejus non exstinguetur, a generatione in generationem vastata erit, Esaj: XXXIV: 4.8.10.11.13.14.15, de plenaria vastatione Ecclesiae quoad charitatem seu quoad bonum, sequitur adventus Domini et Ecclesiae restitutio in Capite sequente, ubi haec: --Laetamini desertum et locus aridus, florendo floreat, et exultet: ecce Deus vester in vindictam veniet, in retributionem Dei ille veniet tunc aperientur oculi caecorum, et aures surdorum aperientur: tunc saliet sicut cervus claudus, et cantabit lingua muti: quin erumpent in deserto aquae, et fluvii in planitie deserti; eritque aridus locus in stagnum, et siticulosus in scaturigines aquarum, erit ibi semita et via, quae via sanctitatis vocabitur: sic redempti Jehovae revertentur, et venient Zionem cum cantu, et gaudium aeternitatis super capite eorum, laetitia et gaudium assequentur, fugient tristitia et gemitus, Esaj: XXXV: 1.2.4.5.6.7.8.10, haec de adventu Domini et statu Coeli et Ecclesiae post redemptionem.